شاہ سے زیادہ شاہ کے وفاداروں کا مکمل احتساب ہوگا، چیرمین نیب

 لاہور: چیرمین نیب جسٹس (ر) جاوید اقبال کا کہنا ہے کہ شاہ سے زیادہ شاہ کے وفاداروں کا مکمل احتساب ہوگا جب کہ جمہوریت کے خلاف نیب کوئی سازش نہیں کر رہا۔

چیرمین نیب جسٹس (ر) جاوید اقبال نے ایل ڈی اے سمیت تمام ریگیولیٹرز کو وارننگ جاری کرتے ہوئے کہا ہے کہ نجی ہاؤسنگ سوسائٹی کسی کی بھی ہو کوئی رعایت نہیں کی جائے گی، ہاؤسنگ اسکینڈل میں ریگیولیٹرز کا کردار انتہائی ضروری ہے، جب اخبار میں اشتہار دیا جاتا ہے اس پر ریگیولیٹر کیوں خاموش رہتے ہیں۔ ان کا کہنا تھا کہ بیوروکریسی کسی شخص کے اشاروں پر نہیں ناچ سکتی جب کہ شاہ سے زیادہ شاہ کے وفاداروں، غلط احکامات دینے والے اور ان پر کام کرنے والوں کا مکمل احتساب ہوگا۔

چیرمین نیب کا کہنا تھا کہ نیب کسی کے ساتھ امتیازی سلوک نہیں کرتا،  میری توجہ پورے ملک پر مرکوز ہے، میں صرف کیس کو دیکھوں گا، کسی صوبے کو نہیں، نیب کو سیاسی رنگوں میں نہ رنگیں، نیب کی اپنی کوئی عدالت نہیں، نیب صرف عوامی ادارہ ہے جب کہ جمہوریت کے خلاف نیب کوئی سازش نہیں کر رہا۔

Comments (0)
Add Comment