مقامی کار اسمبلرز نے گزشتہ ماہ ریکارڈ گاڑیاں فروخت کیں

27

کراچی: مقامی کار اسمبلرز نے جنوری 2018 میں 23 ہزار 700 گاڑیاں کی ریکارڈ فروخت کی۔

اس اعتبار سے فروخت کا تناسب سالانہ 13 فیصد رہا جبکہ گزشتہ سال کے اسی ماہ میں شرح تناسب 23 فیصد ریکارڈ کیا گیا تھا۔

فروخت میں ریکارڈ اضافے کے حوالے سے بتایا جارہا ہے کہ درآمدی قوانین میں تبدیلی، آن لائن رائڈ سروس، کم شرح سود پر آٹو فنانسنگ کی وجہ سے خریداروں کی دلچسپی بڑھی۔

واضح رہے کہ مجموعی طور پر مالی سال 2018 کے 7 ماہ میں 1 لاکھ 47 ہزار 838 گاڑیاں فروخت کی گئیں، جو گذشتہ سال اسی عرصے کے مقابلے میں 29 فیصد زائد ہے۔

پاک سوزوکی موٹر کمپنی لمیٹڈ (پی ایس ایم سی ایل) سب سے زیادہ فروخت کرنے والی کمپنیوں کی فہرست میں صف اول پر رہی کیونکہ کم صلاحیتی انجن کی حامل گاڑیوں کی وجہ سے استعمال شدہ کاروں کی درآمدی میں کمی واقع ہوئی ہے۔

پی ایس ایم سی ایل کی فروخت میں 29 اضافہ دیکھنے میں آیا جبکہ مہران کی 22 فیصد، ویگن آر کی 100 فیصد، کلٹس کی 15 فیصد سیل ریکارڈ کی گئی۔

دوسری جانب ہونڈا اٹلس کار کی سالانہ 33 فیصد تک فروخت ممکن ہو سکی جبکہ ماہانہ بنیادوں پر 28 فیصد کمی ہوئی اور 3 ہزار 213 گاڑیاں فروخت کی گئیں۔

دوسری جانب پاکستان آٹوموٹیو مینوفیکچررز ایسوسی ایشن (پی اے ایم اے) کی جانب سے جاری کردہ اعداد وشمار میں انکشاف ہوا ہے کہ دسمبر 2017 میں ٹریکٹر کی سیل میں سالانہ 5 فیصد اضافہ دیکھنے میں آیا اور ملت ٹریکٹر کی فروخت میں سالانہ 53 فیصد اضافہ ہوا۔

مالی سال 2018 کے 7 ماہ میں ٹریکٹر کی سیل میں سالانہ 54 فیصد رہی اور 32 ہزار 310 یونٹس فروخت ہوئے۔

پی اے ایم اے کے مطابق حکومت کی جانب سے کسانوں کے لیے ٹریکٹر کی فروخت پر سبسڈی سے ٹریکٹر کی فروخت میں مزید اضافہ متوقع ہے۔

دسمبر 2017 میں پی اے ایم اے کی ممبر کمپنیوں کے تیار کردہ ٹرک اور بس کی سیل میں سالانہ 21 فیصد اضافہ ہوا، مالی سال 2018 کے 7 ماہ میں سیل کا تناسب سالانہ 18 فصد رہا۔

پی اے ایم اے کے مطابق پاک چین اقتصادی راہداری (سی پیک ) منصوبوں کی وجہ سے ٹرک اور بس کی سیل میں مزید اضافہ متوقع ہے۔

اس کے علاوہ دسمبر 2017 میں موٹرسائیکل اور رکشہ کی سیل میں سالانہ 9 فیصد اضافہ ہوا۔

واضح رہے کہ دسمبر 2017 کو پی اے ایم اے کی جانب سے بتایا گیا تھا کہ گزشتہ مالی سال جولائی سے نومبرمیں 71 ہزار 877 کاریں فروخت کی گئی جبکہ اسی عرصے میں رواں برس فروخت ہونے والی گاڑیوں کی تعداد 87 ہزار 273 ہیں۔

مزید خبریں

اپنی رائے دیجئے

آپ کا ای میل ایڈریس شائع نہیں کیا جائے گا.