Mashriq Newspaper

مجھے سیاست میں کوئی ذاتی فائدہ نہیں چاہئے،لشکری رئیسانی

کوئٹہ (سٹی رپورٹر) سینئر سیاست دان وسابق سینیٹرنوابزادہ حاجی میر لشکری خان رئیسانی نے کہا ہے کہ مجھے سیاست میں کوئی ذاتی فائدہ نہیں چائیے، میاںمحمد شہباز شریف سے ہونے والی ملاقات میں صوبے کے اجتماعی قومی مسائل ان کے سامنے رکھے ہیں، میرا ذاتی مفاد بلوچستان کے اجتماعی قومی مفادات کا تحفظ اور آئندہ نسلوں کی خوشحالی ہے۔ یہ بات انہوں نے ہفتے کے روزاسلام آباد سے کوئٹہ پریس کلب کے صحافیوں کی جانب سے رابطہ کرنے پر ٹیلی فونک گفتگو کرتے ہوئے کہی، نوابزادہ حاجی میر لشکری خان رئیسانی نے گزشتہ روز مسلم لیگ (ن) کے مرکزی صدر وسابق وزیراعظم میاں محمد شہباز شریف سے ملاقات کے حوالے سے بتایا کہ محمد شہباز شریف سے ہونے والی ملاقات میں صوبے کے اجتماعی قومی مسائل تحریری طور پر نہ صرف ان کے سامنے رکھے بلکہ ہمارے درمیان ان مسائل پر گفتگو بھی ہوئی ہے ان سے قبل سابق اسپیکر قومی اسمبلی سردار ایاز صادق سے کوئٹہ میں ہونےو الی ملاقات میں بھی ان کے سامنے صوبے کے مسائل رکھے تھے، انہوں نے کہا کہ پارلیمانی سیاست میں اختلاف نظر ہوسکتا ہے مگر ڈائیلاگ کا راستہ بند نہیں ہوتا ، ایک سوال کے جواب میں انہوں نے کہاکہ میں سمجھتا ہوں کہ بلوچستان کے لوگوں کو درپیش مسائل کی بنیادی وجوہات کو تلاش اور انہیں حل کرکے ہی صوبے کے معاملات کو بہتری کی طرف لے جایا جاسکتا ہے مسلم لیگ ن کی قیادت کے سامنے صوبے کے مسائل رکھے ہیں تاکہ اس وقت ہمارا صوبہ جن بحرانوں سے گزررہا ہے صوبہ کو ان بحرانوں سے ایک سیاسی عمل، آئین و قانون سازی کے ذریعے نکالا جاسکے۔ ایک سوال کے جواب میں انہوںنے کہاکہ مسلم لیگ ن کی قیادت کے سامنے بھی واضح کیا ہے کہ مجھے سیاست میں کوئی ذاتی فائدہ نہیں چائیے نہ کبھی اپنے ذاتی فائدہ کیلئے سیاست کی ہے میرا ذاتی مفاد بلوچستان کے اجتماعی قومی مفادات کا تحفظ اور آئندہ نسلوں کی خوشحالی ہے ،ایک سوال کے جواب میں انہوںنے کہاکہ سیاسی اور پارلیمانی جدوجہد کے ذریعے بلوچستان کے آئندہ نسلوں کیلئے اپنا کردار ادا کرتے رہیںگے

You might also like
Leave A Reply

Your email address will not be published.