Mashriq Newspaper

کیچ میں سیکیورٹی فورسز کی کارروائی، 5 اہلکار شہید، 3 دہشت گرد ہلاک

بلوچستان کے ضلع کیچ میں سیکیورٹی فورسز کی کارروائی کے دوران 3 دہشت گرد مارے گئے جبکہ فائرنگ کے تبادلے میں 5 فوجی اہلکار شہید ہوگئے۔

پاک فوج کے شعبہ تعلقات عامہ(آئی ایس پی آر) سے جاری بیان کے مطابق 13 جنوری کو ضلع کیچ کے علاقے بلیدہ میں سیکیورٹی فورسز کی کارروائی کے دوران دہشت گردوں نے سیکورٹی فورسز کی گاڑی پر دیسی ساختہ دھماکا خیز مواد سے حملہ کیا۔

بیان میں کہا گیا کہ دھماکے  کے بعد دہشت گردوں کے ساتھ شدید فائرنگ کا تبادلہ ہوا اور سیکیورٹی فورسز نے دہشت گردوں کے ٹھکانوں مؤثر انداز میں نشانہ بنایا، جس کے نتیجے میں 3 دہشت گردوں کو جہنم واصل کر دیا گیا۔

آئی ایس پی آر نے بتایا کہ کارروائی کے دوران دہشت گردوں کی فائرنگ سے پاک فوج کے 5 جوانوں نے بہادری سے لڑتے ہوئے جام شہادت نوش کیا۔

بیان میں بتایا کہ شہید اہلکاروں میں پنجاب کے شہر ساہیوال سے تعلق رکھنے والے 23 سالہ سپاہی ٹیپو رزاق، کراچی سے تعلق رکھنے والے 24 سالہ سپاہی سنی شوکت، ضلع لسبیلہ سے تعلق  رکھنے والے 23 سالہ سپاہی شفیع اللہ، اورکزئی سے تعلق رکھنے والے 25 سالہ لانس نائیک طارق علی اور ضلع میانوالی سے تعلق رکھنے والے 25 سالہ سپاہی محمد طارق خان شامل ہیں۔

آئی ایس پی آر نے بتایا کہ علاقے میں دیگر دہشت گردوں کی موجودگی ختم کرنے کے لیے سیکیورٹی فورسز کی جانب سے کارروائی جاری ہے، پاکستان کی مسلح افواج قوم کے ساتھ مل کر بلوچستان کے امن، استحکام اور ترقی کو سبوتاژ کرنے کی کوششیں ناکام بنانے کے لیے پرعزم ہیں۔

پاک فوج نے بیان میں کہا کہ ہمارے بہادر جوانوں کی ایسی قربانیوں سے ہمارا عزم مزید مضبوط ہوتا ہے۔

You might also like
Leave A Reply

Your email address will not be published.