افغان ٹرانزٹ ٹریڈ کے نام پر معاشی دہشتگردی کی اجازت نہیں دی جا سکتی: جان اچکزئی

نگراں صوبائی وزیرِ اطلاعات بلوچستان جان اچکزئی  کا کہنا ہے کہ افغان ٹرانزٹ ٹریڈ کے نام پر معاشی دہشتگردی کی اجازت نہیں دی جا سکتی۔

جان اچکزئی نے کوئٹہ میں پریس کانفرنس کرتے ہوئے کہا کہ پاکستان خطے میں تجارت کا فروغ چاہتا ہے۔

انہوں نے کہا کہ افغانستان ہمارا پڑوسی ملک ہے، اس کے ساتھ تجارتی تعلقات ہیں لیکن افغان ٹرانزٹ ٹریڈ کے نام پر معاشی دہشت گردی کی اجازت نہیں دی جا سکتی۔

جان اچکزئی کا کہنا ہے کہ افغان ٹرانزٹ ٹریڈ کے نام پر ملکی معیشت کو نقصان پہنچانے کی کوشش کی جا رہی ہے۔

ان کا کہنا ہے کہ لگژری آئٹمز کی درآمد کی حوصلہ شکنی کے لیے پاکستان نے ڈیوٹی پر کئی گنا زیادہ اضافہ کر دیا ہے۔

جان اچکزئی نے مزید کہا ہے کہ پاکستان کے نرم رویے کی وجہ سے معاشی دہشت گرد فائدہ اٹھا رہے تھے، افغانستان اور دیگر ہمسایہ ممالک باہمی تجارت پر توجہ دیں۔

انہوں نے یہ بھی کہا کہ تجارت پر توجہ سے ہماری معیشتوں کا بھی فائدہ ہو گا اور مافیا کی بھی حوصلہ شکنی ہو گی۔